Sprache ändern:
Deutsch Polnisch Sorbisch
 
Druckansicht öffnen
 

Powěsći ze Šule za dolnoserbsku rěc a kulturu

 

Aktualne pšašanja a problemy wokoło serbskeje rěcy

Šula za dolnoserbsku rěc a kulturu jo zasej nowy studijny źeń pśigótowała za nalětny semester, něnto zasej k wósebnej temje aktualnych pšašanjow serbskeje rěcy a kak móžomy lěpjej krewitalizaciji něco pśinosowaś. Studijny źěn se wótmějo 15.3.2024 wót 9:00 góź. až do 14.30 góź. w Serbskem domje w měsće.

Serbska rěc słuša k nejwěcej wobgrozonym rěcam Europy. Wóna jo kus našeje domownje how w Dolnej Łužycy. Aby se zdźaržali, pśewjeduju se južo wjele lět mimo serbskeje wucby a rěcnych kursow za dorosćonych teke wšake iniciatiwy a projekty ako na pś. Rěcny projekt Witaj abo Zorja. Wšykne toś te procowanja pak njejsu mógali wóteběranje aktiwnych powědarjow / kow zaźaržaś. Nowe slěźenja a wšakorake wucbne metody lubje něnto wuspěchy, kótarež mógu k zdźaržanju serbskeje rěcy pśinosowaś.

Naš studijny źeń wobswětlujo w tśich pśinoskach toś te nowe zachopki a pokazujo perspektiwy za naš rěcny pśichod. K studijnemu dnju smy pśepšosyli familiju dr. Emali a dr. Willi Bartholdojc z chósebuzkeje uniwersity, prof. dr. Barbaru Mertins z Dortmunda a dr.  Cordulu Ratajczakowu a Juliana Niče wót projekta „Zari“ z Budyšyna. Cośo dalšne wobšyrne informacije k tomu měś, glědajśo pšosym na naš internetowy bok a pśizjawśo se na toś ten źeń pód 0355 792829.